ويهل علينا 25 يناير من عام 2012 والثورة مستمرة

ليلة 25 يناير من عام 2012 .. عدت سنه من يوم 25يناير 2011 وأحنا يامصر متعبناش وميأسناش
عدت سنة يامصريين واللي قتلوا أخوتنا في الميدان فين؟
عدت سنة يا مصريين واللي سرقوا فلوسنا فين ؟
المشير هـل علينا اليوم وبيقول لقد قررت الغاء حالة الطوارئ .. من اللي مكنك أنك تقرر وتقف أمام الشاشة وتخطب !
موش برضو الثوار .. الثوار اللي استشهدوا واللي اتصابوا واللي في الزنازين واللي مكملين في الميادين
عدت سنة على الثورة وأمس كان أول برلمان ليكي يا مصر منذ بداية الثورة برلمان في الأخوان اللي كانوا جماعة محظورة هما الأغلبية
أيو أغلبية واللي أنتخبهم الشعب .. أيوة عارفين وموش خايفين منهم ولاه عندنا فويبا منهم .. الشعب اللي ثار على مبارك جابهم البرلمان فــلاتندموا مصـــر فوق الجميع يا بشر كل المهم عندنا أنه يكون في خدمتك ياغالية يا أم الدنيا يامصر
والشعب هو اللي ح يدافع عن حقة لو ماكانوا قد المسئولية ..
أحنا الشعب .. احنا الشعب الخط الأحمر
يا شعب ياللي دفع تمن حرية الشوارع دم أحفظ أسامي الشهداء صم

أحنا الشعب نازلين بكرة كل ميادين مصر أحنا ولادك يا مصر قالوا علينا عدننا في الليمون 85مليون اسم الله علي ولادك يا مصر يحرسهم ويحميهم من العين ما يعرفوا أنه عددنا مصدر قوتنا
نازلين علشان لسة رغيف العيش بتجاب بالعافية والوقفة في الطوابير
لسة الحرية ما تحققت ولسه في محاكمات عسكرية للمدنيين
لسة العدالة الأجتماعية ما تحققت لسه ما في حد أدنى لــ الأجور لآجل بلدنا تشوف النور وحد أقصى لــ الأجور لــ الي عايش في القبور
لسة كرامة المواطن المصري موش عزيزة على حكامها شهداء ماتوا وما خدنا طارهم وشهداء لسة دمهم بيضخ في الثورة ويقول فداكي يا مصر
مصر يا أم ولادك أهم .. دول علشانك شالوا الهم
خلاااااص يا مصريين ولاخوف ولا رعب من الحواجز الأسمنتية والأسلاك الشائكةاللي محوطة ميدان التحرير لحد كل السلطة ما تبقى في أيد الشعب
أنزل بكرة يا مصري ميادين الحرية في مصر تنتظر
في عيال في الشوارع جعانين وفي ناس في العشوائيات بردنين
وشباب زي الورد صفوا عيونها ودم الشهداء لسة على الأسفلت في التحرير
وأم الشهيد نار قلبها ما تنطفي بتنوح وتقول القصاص القصاص
فـــ هل من مجيب !

صلي .. أفطر كويس .. أضحك في وش أهلك علشان يدعوا لك وأن قدرت خدهم معاك هما وأصحابك .. ألبس جينز وكوتشي ..فضي كارت الميموري .. وأشحن الموبيل .. رقمك القومي في جيبك وموبيلك في أيدك .. رقم الدفاع عن المتظاهرين 0163347782..0120624003 ورقم الدعم الطبي 0109952374

الثورة مستمرة سلمية ونظافة الميدان واجبة ولو قابلت الطرف التالت قله روح أقعد أبكي على النظام اللي سقط
لـــــسه يا حبيبتي يا مصر عندي كلام كتير أقوله بقى علشان أتغزل فيكي وفي جمالك وأحكي عن عجايبك .. بــــــس من كتر اللي جواي ما هو كتير أوي جداً خالص ..عاجزة أني أقول أي شئ غير أني مغرمة صبابا في عشقك يا مصر

جيني الثائرة